أقسم بالله العظيم ... ان اكون جنديا وفيا لجمهورية مصر العربيه..

محافظا علي امنها وسلامتها ... حاميا ومدافعا عنها.....

في البر والبحر والجو... داخل وخارج الجمهوريه.... مخلصا

لرئيس الجمهوريه....مطيعا للأوامر العسكرية.....

منفذا لاوامر قادتي ... ومحافظا علي سلاحي .

لا اتركه قط حتي اذوق الموت... والله علي ما اقول شهيد)

انا اتخرجت اخيرا من كليه الضباط الاحتياط وبقيت ملازم ودي تبقي تاني كليه اتخرج منها :D
الصعب خلص ولسه باقي الاصعب .. وبجد دي كانت من احلي الايام الي قضتها ف حياتي وزي ما كنت رايح الكليه دي زعلان
مشيت منها زعلااان .. مع اختلاف الاسباب طبعا
كنت بحس وانا قاعد هناك مع الرجاله ااني قاعد مع اهلي والله ..اربع شهور ونص مش قليل .. اتنفخنا مع بعض ولعبنا مع بعض واكلنا مع بعض احلي اياام صعبها قبل سهلها .. فاكر كل يوم ف الاربع شهور ونص كلهم @_@
فاكر لما كنا بنعد الايام يوم يوم عشان ننزل اجازه بعد 37 يوم الي ف الاول
فاكر اول يوووم يدوب دخلنا الكليه لقينا سيوول بتنزل والكهربه قطعت :D .. قلت هيه من اولها سيول وكهربه تقطع
فاكر اول يوم رحته الكليه واستقبالهم لينا ..فاكر القطر بتاع الكليه :((
فاكر لما كنا بنقف بالست ساعاات ف الشمس وطالع عنينا سووي ونشتم ف الي خلفوا الجيش :D..ونروح بعد كدا المحاضرات وننام فيها
وفاكر بقا لما دخلت موبايلي ف الزياره وكان هو الموبايل الوحيد الي بيتكلم بيه 42 واحد :D
وكانت اقصي طموحنا ف الفتره دي اننا نروح ننام الساعه تسعه عشان نصحي الساعه خمسه ..يالهوي علي دي ايام
لما كنا نريح قبل وقتنا بساعتين كدا ونخرج ..طبعا الخروجه جوه ملهاش حل لحد الكانتين ونشرب شاي ونقعد نعد النجوم :D
او نختلس بعض النظارات من التي في :D
هيه دي الفتره ا لوحيده ف حياتي الي كنت بشووف كل يوم الشروق والغرووب :D ..كانوا حلوين اوي
وفاكر لما كنا بنتفرج علي الماتشاااااااات سووووووي .. والاهلاويه يغيظوا ف الزملكاويه :D
دا النفخ الي حضرته مع كل اصحابي جوااااا
طبعا كل دا استمر بحذفيره كدا حوالي 45 يوم ..والحمد لله بداءت الدنيا تبقي اسهل شويه شويه ..لحد ما بقت سهله اوي :D
وبلاش تعرفوا سهله اوي لدرجه ايه :D ...
بس زي ما كنا ف الايام الصعبه دي مع بعض بردو ف الايام الحلوه جدا مع بعض هزار ولعب :D
اها نسيت اقول فاكر التزويغ من المحاضرات هههههههه
وبجد احنا عندنا قائد مدير الكليه شخص ملوش حل .. بيعامل طلبه الكليه زي اولاااااده .. بيقف جنب كل الطلبه حتي لو كنا احنا الي غلطانين كان بيقف معانا ..اللوا احمد حلمي الهياتمي ..ربنا يخليه لمصر ..رقم تلفونه مع كل طالب ف الكليه بنكلمه دايركت .. طبعا الكلام دا مش بيحصل ف الجيش غير مع اللوا احمد .. بس لو يقلل من الخطب شويه :D
وخفه دم العميد اشرف قائد لواء الطلبه ..حتي وهو بيدي للطلبه جزاء ..ملوش حل
كان يطلع عين اهلنا وف الاخر واحنا مسافرين بابتسامه عريضه كدا توصلوا بالسلامه يارجاله
فاكر اخر اللشه ليييه قبل ما يسيب الكليه للاسف ويمشي قبل ما نتخرج بشهرين كدا
لما قفش طالب معاه سجاير ف بيقله بتجيب سجاير ليه يابني ..الواد قله دي وزه شيطان يافندم
قله طب عشر ايام حبس سبعه ليك وتلاته للشيطان هههههههه
الكليه نجحت ف حجات كتير بس اول حاجه فعلا نجحت فيها الكليه انها امتصت غضب الناس دي كلها لان تسعين ف الميه مننا بنكون رايحين مخنوقين طبعا جدا .. وتحببك كمان ف الحوار دا لدرجه اننا نبارك لبعض علي النجمه الاولي :D
ومش هنسي طبعا شط فايد .. مكنش ينفع نسيب الكليه قبل ما نتمشي ف فايد طبعا ..حفظتها :D
واخيرا الحمد لله النهارده حفله التخرج كان يوم متعب جدا بس حلو اووووي ..اهالي كتيييييير جدا وزغاريط بقا واحنا بنعمل العرض
كان يوم جامد جدا ف الذاكره الابديه @_@
كفايه بقا مش عايز اتكلم ف الموضوع دا اكتر من كداا :(
ذكريات كتيره اوي ف الفتره ديي ممكن اقعد تسع ايام اتكلم فيها .. وفعلا عرفت معني الجمله الي كنا بنسمعها من الي قبلنا دي
جمعونا اغراااب وفرقونا احباااب
انا حاسس اني يوم الجمعه هلبس واروح الكليه عاديي تاني
..
وان شاء الله ربنا يكرمنا ف الفتره الجايه دي وفعلا نبقي اد المسئوليه
لاننا خلاص بقا تحولنا ف يوم وليله من طلبه ف كليه الي ضباط شايلين مسئوليه
واخيرا احب اقول انا بقيت ملازم سلاحي دفاع جوي ..صواريخ بقا وحركات :D

خبر تخرج الدفعه ف اخبار الخامسه


دي بقاا فيديوهات لحفلات دفعات قبلنا لسه فيديو حفلتنا منزلش :D
حجات معمولها مونتاج كداا





ليبقي شعار كليتنا .. الايمان الوطن التضحيه